கொரானா - மகள் வரைந்த ஓவியங்கள்

கொரானாவிற்கு ஊரடங்கு தொடங்கி நாளை (31.05.2020) மொத்தம் 68 நாட்கள் முடியப் போகின்றது. 

67 நாட்கள் - கற்றதும் பெற்றதும்

2013 ஆம் ஆண்டு 167 பதிவுகள் எழுதியுள்ளேன். 2019 ஆம் ஆண்டு 150 பதிவுகள் எழுதியுள்ளேன். ஆனால் 2020 முதல் ஐந்து மாதத்திற்குள் 122 பதிவுகள் வந்துள்ளது.  காரணம் கொரனா ஊரடங்கு. இந்த வருடம் 1000 ஆவது பதிவும் கூடுதலாகச் சேர்ந்துள்ளது. 

 

தினமும் இரண்டு பதிவுகள் எழுத வேண்டும் என்ற எண்ணம் நிஜமாகியுள்ளது.  இதன் காரணமாக வேறு எங்கும் கவனம் செலுத்த முடியாத அளவிற்கு கொரானா பின்னால் ஓடிக் கொண்டே இருந்த காரணத்தால் வேறு எந்தச் சொந்தக் கவலைகளுக்கும் இடமில்லாமல் போய்விட்டது.

மகள்களில் இருவர் பத்தாம் வகுப்பு என்பதால் நம் தமிழக அரசின் குளறுபடியான அறிவிப்புகளால் (ஒவ்வொரு மாணவர்களும்) நரகவேதனையை அனுபவித்துக் கொண்டிருக்கின்றார்கள்.

மகளொருவர் 90 மணி பயிற்சியின் மூலம்,  வணிகம் சார்ந்த படிப்பை முடித்துள்ளார். இன்று அதற்கான இணைய வழியே பரிட்சை எழுதுகின்றார். இவர் ஓவியத்தில் அசாத்தியத் திறமை பெற்றவர். இயற்கையிலேயே இந்தத் திறமை இவரிடம் உள்ளது. எவரிடமும் பயிற்சி எடுக்காமல், கற்றுக் கொள்ளாமல் படம் வரையும் ஆற்றல் உள்ளது. இதில் உள்ள படங்கள் அனைத்தும் அவர் வரைந்தது. இது தவிர கைவினைஞர் செய்யும் காரியங்களில் ஈடுபாடு காட்டியுள்ளார்.

என் பல பழக்கங்கள் மாறியுள்ளது. உணவு சார்ந்த ஆசைகள் கட்டுப்பாட்டுக்குள் வந்துள்ளது.  குரல் வழிப் பதிவு ஒவ்வொரு ஞாயிறு அன்றும் வருகின்றது. ஆயிரம் பதிவுக்குப் பிறகு அடுத்த பாதையில் பயணிக்கின்றேன்.

அமேசான் மின் நூல் தளத்தில் வெங்கட், ஞானப்பிரகாசம் இவர்களைத் தொடர்ந்து ஜம்புலிங்கம் அவர்கள் வந்துள்ளார். தன் முதல் மின்னூலை வெளியிட்டுள்ளார். வாழ்த்துகள்.  தனபாலன் எப்போது வருவீர்கள்?

வலைபதிவில், ஃபேஸ்புக்கில் எழுதிய விசயங்களைத் தவிர இன்னும் வெளியிடாமல் தனிப்பட்ட முறையில் எழுதியிருக்கும் தகவல்களுடன் அந்த 68 நாட்கள் என்ற பெயரில் கொரானா வைரஸ் 2020 குறித்து ஒரு மின்னூல் வெளிவரும்.  முழுமையாக ஆவணமாக இல்லாவிட்டாலும் இந்தக் கால கட்டத்தில் என்ன தான் நடந்தது? என்பதனை அறிய ஆர்வம் உள்ளவர்களுக்கு (25 வருடம் கழித்து) இந்நூல் உதவக்கூடும்.  இது அமேசான் தளத்தில் 26 ஆவது மின்னூல்.  கிண்டில் மொழி என்ற நூலைத் தவிர 24 புத்தகங்களையும் இலவசமாக வாசிக்கக் கொடுத்துள்ளேன். மக்களின் ஆதரவு மகிழ்ச்சியைத் தந்தது.  கொரானா ஊரடங்கு இந்த விசயத்தில் எனக்கு உறுதுணையாக இருந்தது.

நாளை வரவிருக்கும் குரல் பதிவில் பாஜக மற்றும் அதிமுக அரசு என்ன செய்தது?  எடப்பாடியாரும், மோடியும் கோவிட் 19 காலத்தில் இந்தியர்களுக்கு, தமிழர்களுக்கு என்ன செய்தார்கள் என்பதனைப் பற்றி பேசியுள்ளேன்.  ஏற்கனவே புலம் பெயர்த் தொழிலாளர்கள் குறித்த பேச்சைக் கேட்டு விட்டு தமிழகப் பத்திரிக்கையாளர் ஒருவர் எங்களுக்கு இப்படிச் செய்ய வேண்டும் என்று தோன்றவில்லையே என்றார்.  அதே போல நாளை வரும் பேச்சும் ஆவணம் போலவே இருக்கும்.  நாளை காலை நேரம் இருப்பவர்கள் கேட்டுப் பார்க்கவும். நண்பர்களுக்கு வாய்ப்பிருந்தால் அறிமுகம் செய்து வைக்கவும் நன்றி.

கொரானா ஊரடங்கின் போது திருப்பூர் மாவட்ட ஆட்சியர் திரு. விஜய கார்த்திகேயன் தலைமையில் பல் வேறு அரசுத்துறைகள் ஒருங்கிணைந்து திருப்பூர் மக்களுக்குச் சிறப்பாக பணியாற்றினார்கள். பல சமயங்களில் வியந்து போகும் அளவிற்கு இருந்தது. எங்களுக்குத் தனிப்பட்ட முறையில் எந்தப் பிரச்சனைகளும் உருவாகவில்லை.