"பரமபதம் விளையாட்டு"

சில்லுண்டிகளுக்கு அரசியல் என்ற பாடத்தில் உள்ள "பரமபதம் விளையாட்டு" புரிய வாய்ப்பில்லை. வெட்டுப்படுவது, உடனே வெட்டுக்குத் தயாராக வைத்து இருப்பது, குறிப்பிட்ட காலம் கடந்து வெட்டத் தயாராக வைத்திருப்பது இந்த மூன்று மூன்றும் மிக முக்கியமானது. 

நேரிடையான அரசியல் செயல்பாடுகள். மறைமுக செயல்பாடுகள் இரண்டுக்கும் கீழ் வருவது தான்  திட்டம் வகுத்துக் கொடுப்பது. 

அதிகாரத்தை அடையும் வரைக்கும் கட்சிக்கு வழிகாட்டியாக இருப்பது. அதிகாரத்தை அடைந்த பின்பு நிர்வாகத்திற்கு ஆலோசனைகள் சொல்வது.

இதற்கென செயல்படுபவர்கள் பெரும்பாலும் வெளிச்சத்தில் தங்களை மிக அபூர்வமாகவே வெளிப்படுத்திக் கொள்வார்கள். இவர்கள் காலம் முழுக்க கொள்கைவாதிகளாகவே தங்களை அடையாளப்படுத்திக் கொள்வார்கள். பாஜக வில் இப்படியானவர்கள் இந்தியா முழுக்க ஆயிரக்கணக்கான பேர்கள் வெளியே தெரியாமல் செயல்படுவதே ஒரே நோக்கம் என்ற பாதையில் பயணிக்கின்றார்கள். இது தான் கட்சியின் பலம். நிரந்தர நீடித்த வளர்ச்சியின் அடையாளம். இப்படித்தான் பாஜக இன்று வென்று வந்துள்ளது.

"சாணக்கியர்" என்று எதிர்க்கட்சிகள் எரிச்சலுடன் பார்க்கும் மத்திய உள்துறை அமைச்சர் மரியாதைக்குரிய அமித்ஷா இன்று சென்னை வரும் சமயத்தில் முதல் முறையாக பிஎல். சந்தோஷ் அவர்களும் வருகை தருகின்றார்.

ஏழெட்டு மாதங்களுக்கு முன் பாஜக வில் எல் முருகன் என்பவர் யார்? எங்கேயிருந்தார்? என்ன பதவியில் இருந்தார்? என்று கேட்டால் பாஜகவில் உள்ளவர்களுக்கே குறிப்பிட்ட சிலருக்குத் தான் தெரியும்.  இன்று "வேல் யாத்திரை" தொடங்கிப் பல களப்பணி மூலம் ஊடகங்களால் முன்னிலைப்படுத்தும் அளவிற்குத் தமிழக மக்களுக்கு அறிமுகமாகும் அளவிற்கு வளர்ந்துள்ளதற்குக் காரணம்..........

தன்னை இகாப பணியில் இருந்து விடுவித்துக் கொண்டு ஓய்வு பெற்று இன்று தமிழக பாஜக வின் களப்பணியாற்றிக் கொண்டிருக்கும் து.செ அண்ணாமலை அவர்கள் குறித்து இன்று தமிழ் கூறும் நல்லுலகம் இன்று அறிந்திருப்பதற்குக் காரணம்.......

பிஎல். சந்தோஷ் அவர்கள். ஆர்.எஸ்.எஸ். வேர்களும் விழுதுமாய் இருப்பவர்.... தென் மாநில பாஜக அரசியல் நிலைப்பாடுகளுக்கு ஆதியும் அந்தமுமாக இருப்பவர்.

கர்நாடக முதல் மந்திரியாக இருந்தாலும் எடியூரப்பா இவரின் கருத்தறியக் காத்திருப்பதும்........

மோடி, அமித்ஷா தென் மாநிலங்கள் சார்ந்து அரசியல் நிலைப்பாடுகள்  எடுக்கப்படும் முடிவுகளுக்கு சந்தோஷ் அவர்களின் பார்வையின்றி அணுவும் அசையாது.

தன்னை கட்சியில், கொள்கைகளில், சித்தாந்தங்களில் ஆழ அகல விழுது பரப்பி வழிகாட்டியாய் இருக்கும் சந்தோஷ் அதிகார ஆசையில் எவருடனும் போட்டியிடுவதில்லை. 

ஆனால் அதிகாரத்தை அடைய ஆசைப்படுபவர்கள் அனைவரும் இவரின் கண்ணசைவுக்காகக் காத்திருப்பது தான் இன்றைய சூழல்.

இன்று சென்னையில் நடக்கும் பாஜக கட்சி சார்ந்த கூட்டங்களில் கலந்து கொள்கிறார். திமுக வில் இருந்து நீக்கப்பட்ட கேபி ராமலிங்கம் முதல் பல நபர்கள், ஆளுமைகள், மாற்றுக்கட்சியினர் பலரும் இன்று பாஜக வில் இணைய இருக்கின்றார்கள். 

இன்று மாலை தெரியவரும்.

கட்சி அரசியல் செயல்பாடுகள் என்பதும் நீண்ட காலச் செயல் திட்டங்கள் என்பதும்,  பணம் கொடுத்து ஆள் வரவழைத்து கடன் வாங்கி அறிக்கை வாயிலாகவே நாள் முழுக்க பின்னால் ஒளிந்து கொண்டு நடத்தப்படுவது அல்ல. 

அதற்கு ஆளுமைப்பண்பு இயற்கையிலேயே இருக்க வேண்டும். குறைந்தபட்சம் தன் உழைப்பின் மூலம் கற்றறிந்து தன்னை வளர்ந்து மேம்படுத்திக் கொள்ள தெரிந்திருக்க வேண்டும். அதற்கு  குறிப்பிட்ட சித்தாந்தம் இருக்க வேண்டும். அது உங்களுக்குப் பிடிக்காமல் போனாலும் பரவாயில்லை. அது வெற்றியடைந்தால் அது தான் அரசியலில் வளர்ச்சி. 

அதுவே தான் வெற்றி. 

இது தான் இங்குள்ள எதார்த்த அரசியல்.

புரிந்தவர்கள் அமைதியாகவே செயல்படுவார்கள். 

காரணம் அவர்களின் பயணம் நீண்டதாக இருக்கும். இலக்கை மட்டும் யோசித்து முன்னேறிக் கொண்டிருப்பார்கள். 

இலக்கில்லாதவர்கள் புரியாதவர்கள் ட்விட்டரில் "கோலமாவு கோகிலா" படம் காட்டுவார்கள்.

ஈபிஎஸ் திருப்பூர் வருகையும் சிறுதொழில் வளர்ச்சியும்