Monday, November 05, 2012

(இனி) மின்சாரமே கனவு

மின்சாரம் --  புரிந்து கொள்வதற்கு மட்டும்  பயன்படுத்த அல்ல. 1


இந்த தொடரின் கருத்துக்கள் இங்கே கொடுக்கப்பட்டுள்ள புத்தகத்தின் வாயிலாக அதில் எழுதியுள்ள முக்கிய கருத்துக்களின் அடிப்படையில் எழுதப்படுகின்றது.


மின் மிகை மாநிலம்.

கடந்த சில மாதங்களாக தமிழர்களுக்கு கிடைத்த தமிழ் வார்த்தை இது. அங்காடித் தெரு என்ற வார்த்தையை தமிழர்கள் திரைப்படத்தின் மூலம் தெரிந்து கொண்டது போல இப்போதுள்ள தமிழகத்தில் நிலவி வரும் மின்சார பற்றாக்குறையில் அரசாங்கத்தால் சொல்லப்படும் கனவு வார்த்தை தான் மின் மிகை மாநிலம். 

மின் மிகை மாநிலமாக தமிழகத்தை மாற்றப் போகின்றோம் என்ற நம்பிக்கை வார்த்தைகள் ஒரு பக்கம் இருக்கட்டும்.

மாறுமா? மாற்ற முடியுமா? 


கலைஞர் தலைமையில் இருந்த ஆட்சியாகட்டும், தற்போது ஆண்டு கொண்டுருக்கும் அம்மையார் ஆட்சியாகட்டும் தமிழ்நாட்டில் மின் பற்றாக்குறையின் பின்னால் உள்ள உண்மையான நிலவரங்களை எவரும் புரிந்து கொள்ளவில்லை.

ஆட்சியில் இருப்பவர்களும் சொல்ல முடியாது என்பது தான் நிதர்சனம், ஆனால் சமாளிக்க திட்டங்கள் தொடங்கப்பட்டுள்ளது.  விரைவில் எல்லாமே சரியாகிவிடும் என்ற வார்த்தையை நாம் நம்பித்தான் வாழ வேண்டும்.

இது ஆட்சியாளர்களுக்கு அப்பாற்பட்ட விசயமாக மாறியுள்ளது. ஒரு துறையின் அமைச்சரையே ஒரு நிறுவனம் மனம் வைத்தால் மாற்ற முடிகின்ற காலத்தில் நாம் வாழ்ந்து கொண்டு இருக்கினறோம்.  ஆனால் சராசரி இந்திய குடிமகன் இன்னமும் இந்தியாவில் உள்ள ஜனநாயகத்தை நம்பி வாழ்ந்து கொண்டுருக்கின்றான். 

முதலில் மின்சாரம் குறித்த தொடக்க காலத்தை பார்த்துவிடலாம்.

இந்திய நாடு சுந்திரம் அடைந்த போது வெறும் 1300 அளவிலான மின்சாரமே உற்பத்தி செய்யப்பட்டது. இப்பொழுது 1,24,311 மெகாவாட் அளவிற்கு உற்பத்தி செய்யப்படுகின்றது. ஆனால் நமக்கு தற்போதைக்கு தேவைப்படுவதை பூர்த்தி செய்ய வேண்டுமென்றால் இன்னும் அதிகமாக 1,00,000 மெகாவாட் தேவை என்று கணக்கிட்டுள்ளனர். 

தற்போது நடைமுறையில் நாம் பெறும் மின்சாரம் எந்தந்த வகையில் கிடைக்கின்றது என்பதை பார்த்து விடலாம்.

இந்தியாவின் ஒட்டுமொத்த மின்சார தேவையில் நிலக்கரி, எரிவாயு, மற்றும் எண்ணெய் அடிப்படையில்  அமைந்த அனல் மின்சார உற்பத்தி என்பது 66 சதவிகிதமாகவும், புனல் (நீர்) மின்சாரத்தின் 26 சதவிகிதமாகவும் உள்ளது. 

இந்தியாவில் தற்போது இயங்கிக் கொண்டுருக்கும் அணுமின் உலைகள் மூலம் நாம் பெறுவது வெறுமனே 2.7 சதவிகிதமாகவும் உள்ளது. ஆனால் இயங்கிக் கொண்டுருக்கும் அணுமின் உலைகளுக்கு இந்திய அரசாங்கம் செலவழித்த, செலவழித்துக் கொண்டுருக்கும் தொகையானது தனியாக பார்க்க வேண்டும்.  

இந்த அணு உலைகள் என்பது நாட்டின் வளர்ச்சிக்கு என்ற ஒரு வார்த்தைக்குள் முடித்து விடுவார்கள். 

காரணம் அதற்கு பின்னால் உள்ள அத்தனை விசயங்களும் அணுகுண்டு ரகசியங்களைப் போல இருப்பதால் நாம் இப்போது அதைப் பற்றி பேசி ஒன்றும் ஆகப்போவதும் இல்லை. 

அணு உலைகளை தயாரிப்பவ்ர்கள், அதனை விற்பவர்கள், இடைத்தரகர்கள், சர்வதேச நாடுகள், இடையில் உள்ள லாபிக்களுடன் சேர்ந்து பயன்படும் இந்திய அரசியலில் உள்ள செல்வாக்கு படைத்தவர்கள் பெறும் ஆதாயங்கள் என்று அதன் அத்தியாயம் தொடர்கதை போலவே போய்க் கொண்டுருக்கும்.

இது நாட்டின் பாதுகாப்பு சம்மந்தப்பட்டது என்று சொல்வார்கள். நாமும் பயத்தோடு ஒதுங்கியிருப்பது தான் சரியாக இருக்கும்.

1991 ஆம் ஆண்டு மக்கள் தொகை கணக்கின்படி இந்தியாவின் 5,93,732 கிராமங்களில் 4,74,982 கிராமங்கள் மின் இணைப்பை பெற்றிருந்தன. அதாவது 80 சதவிகித கிராமங்கள் மின்சாரத்தை உபயோகிக்கும் கிராமங்களாக இருந்தன. இந்த சமயத்தில் மற்றொன்றையும் நாம் கவனிக்க வேண்டும். 

2001 ஆம் ஆண்டு எடுக்கப்பட்ட மக்கள் தொகை கணக்கெடுப்பின்படி சுமார் 13.83 கோடி வீடுகள் கிராமங்களில் இருந்தன. ஆனால் இந்த தொகையில் 60.20 சதவிகித வீடுகளால் மட்டுமே மின்சாரத்தை உபயோகிக்கும் வசதிகள் இருந்தன. 

கிராமங்களில் உள்ள வீடுகளில் மின்சாரத்தை பயன்படுத்தும் கட்டமைப்பு இல்லை என்று சொல்லிவிட முடியாது.  அவர்களால் மின்சாரத்தை விலைக்கு வாங்கி பயன்படுத்த முடியாத சூழ்நிலையில் தான் வாழ்ந்து கொண்டுருந்தனர். 

இந்தியாவில் 1991 ஆம் ஆண்டு முன்னால் பாரதப் பிரதமர் நரசிம்மராவ் ஆட்சி காலத்தில் தாராளமயமாக்கல் என்ற திட்டம் நடைமுறைக்கு வந்தது.  அப்போது நிதி அமைச்சராக இருந்தவர் தற்போதைய பாரத பிரதமர் மன் மோகன் சிங். 

அப்போது உருவான திட்டம் 2012 ஆம் ஆண்டுக்குள் நாட்டில் வாழ்ந்து கொண்டுருக்கும் அனைவருக்கும் மின்சாரம் என்ற கொள்கை வகுக்கப்பட்டது.  அப்போது உருவானது தான் கிராம மின்மயமாக்கலுக்கான விரைவுத் திட்டம். ( A COMPREHENSIVE'  BLUE PRINT FOR POWER SECTOR DEVELOPMENT )

இப்போது 2012 ஆம் ஆண்டு முடியப் போகின்றது. பொருளாதார மேதை மன் மோகன் சிங் கூட பிரதமராகவும் இரண்டாவது முறையாகவும் இந்தியாவை ஆண்டு கொண்டுருக்கிறார். 

உருவான திட்டம் தவறா? உருவாக்கியவர்களின் தவறா?

இவர்கள் இந்த திட்டத்தை உருவாக்கும் போது மற்றொரு விசயத்தையும் தெளிவு படுத்தினர்.    இந்தியா 8 சதவிகித பொருள் உற்பத்தியை (GDP) அடைய இந்திய மக்கள் வறுமை நிலையை தாண்டி மேலே வந்து விட வேண்டும். அதற்கு நாட்டின் வளர்ச்சிக்கு மின்சாரம் அவசியமானது என்றனர்.

ஆனால் தற்போதைய நிலைமை?


இந்தியாவில் நடுத்தரவர்க்கமும், அடித்தட்டு மக்களும் வாழ்ந்து கொண்டுருக்கும் வாழ்க்கைக்கு பெயர் 'தர்மசங்கடமான சூழ்நிலை' அல்லது 'ரெண்டாங்கெட்டான் வாழ்க்கை' எனபதாக நாம் எடுத்துக் கொள்ளலாம். ஒவ்வொருவரும் ஒரு விதமான கிடுக்கியில் அகப்பட்ட ஜந்து போலத்தான் வாழ்ந்து கொண்டுருக்கின்றோம். நாம். வாழ்ந்த பழைய வாழ்க்கைக்கும் செல்ல முடியாது. தற்போதையை வாழ்க்கையிலும் விரும்பியபடி வாழ முடியாது.  இது தான் இப்போது நடந்து கொண்டுருக்கிறது.  

காரணம் நாம் விஞ்ஞானத்தின் மூலம் பெற்ற வசதிகள் அதன் மூலம் கிடைத்த வாய்ப்புகள், அனுபவிக்கும் சந்தோஷங்களை. விட்டு ஒதுங்கி நிற்க நமக்கு மனம் வருமா?

உங்க வீட்டில் மிக்ஸி கூட இல்லையா? என்று ஏளனமாக கேட்கும் உலகில் வாழ்ந்து கொண்டு இருக்கின்றோம்.  அம்மிக்கல், ஆட்டுக்கல் போன்றவை எப்படியிருக்கும் என்றே சமகாலத்தில் உள்ளவர்களுக்கு தெரியுமா என்பது சந்தேகமாக உள்ளது. நாம் உடல் உழைப்பை குறைத்து பொருள் ஈட்ட வேண்டிய நடைமுறை வாழ்க்கைக்கு மாறி வெகுகாலமாகிவிட்டது. 

மின்சாரத்தின் மூலம் அன்றாட வாழ்க்கைக்கு நாம் பயன்படுத்தும் பொருட்களின் எண்ணிக்கை நாளுக்கு நாள் அதிகமாகிக் கொண்டே இருக்கிறது.

இது தவிர தன்னுடைய சுகத்திற்கு, வசதிக்கு என்று ஏராளமான பொருட்கள் தினந்தோறும்  சந்தையை ஆக்ரமித்துக் கொண்டேயிருக்கிறது.

ஆசைகளுக்கு அளவில்லை.  அதே சமயத்தில் அவஸ்த்தைகள் என்பதும் இயல்பானதாக மாறியும் விட்டது.

அந்நிய செலவாணியை கணக்கில் வைத்து இன்று இந்தியா என்பது பன்னாட்டு நிறுவனங்களுக்கு தேவைப்படும் ஒரு சந்தையாக மாற்றியுள்ளனர். வரப்போகும், வந்து கொண்டுருக்கின்ற, வந்த அத்தனை நிறுவனங்களுக்கும் நம் நாட்டில் தற்போது உற்பத்தியாகிக் கொண்டுருக்கும் மிச்ச சொச்ச மின்சாரத்தையும் கருணை அடிப்படையில் ஆட்சியாளர்கள் வழங்கிக் கொண்டேயிருக்கின்றார்கள். 

உள் நாட்டு தொழிற்சாலைகள் அம்போவென்று விடப்பட்ட போதிலும இன்னமும் நாட்டின் தொழில் வளர்ச்சிக்கென்று திட்டங்கள் தீட்டிக் கொண்டே இருக்கிறார்கள். தினந்தோறும் தங்கள் வாழ்க்கையை வாழ முடியாதவர்களின் திட்டுக்கள் எதுவும் ஆள்பவர்களின் காதுக்கு செல்வதில்லை. ஆனால் இந்தியாவின் வளர்ச்சி என்று திட்டமிட்டவர்கள் இன்றும் திறமைசாலிகள் என்ற போர்வையில் தான் ஆட்சியில், அதிகாரத்தில் வாழ்ந்து கொண்டு தான் இருக்கிறார்கள்.  

தாங்கள் உருவாக்கிய திட்டங்கள் நடைமுறையில் எப்படி மாறியுள்ளது என்பதை அறிந்த போதிலும் இன்னமும் அவர்களுக்கு விழிப்பு வந்தபாடியில்லை.

தமிழ்நாடு மின்சார வாரியம் லாபத்தில் செயல்பட்டுக் கொண்டுருந்த ஒரு நிறுவனம். மற்ற மாநில மின்சார வாரியங்களைக் காட்டிலும் முதன்மையான இடத்தில் தான் இருந்தது. 

ஆனால் இன்று?  

53,000 கோடி நஷ்டம்.  ஆனாலும் இன்று நமக்கு பயன்படுத்த மின்சாரம் இல்லை.

'"அமைதியாக பொதுமக்கள் ஒத்துழைக்கவேண்டும். 

அடுத்த வருடம் இறுதிக்குள் தமிழ்நாடு மின்மிகை மாநிலமாக மாற்றிவிடுவோம்" என்று ஆட்சியாளர்கள் சொல்வது உண்மையா?

வாய்ப்புகள் உள்ளதா?

தொடர்ந்தால் ஷாக் அடிக்கும்....................


Wednesday, October 31, 2012

காரைக்குடி உணவகம்



உங்க பக்கம் இப்ப மழை பெய்யுதா? என்று நண்பர் கேட்கும் போது ஆச்சரியமாக இருக்கிறது.  காரணம் தொடக்கத்தில் மழை என்றால் ஒரு ஊருக்குள் எல்லா பகுதிகளிலும் வெளுத்துக்கட்டும்.  ஆனால் திருப்பூருக்குள் ஒவ்வொரு பகுதியிலும் ஒவ்வொரு விதமாக இந்த மழை இப்போது பெய்து ஊரை சுத்தப்படுத்திக் கொண்டுருக்கிறது. குறிப்பிட்ட இடத்திற்கு சற்று நேரம் கழித்து செல்லாம் என்றால் அந்த பக்கம் அப்போது தான் மழையின் சாரல் தொடங்குகின்றது. 

வினோதமாக இருந்தாலும், அவசர கடமைகளை மீறி நனைந்து செல்வது வெகு நாளைக்குப் பிறகு மகிழ்ச்சியாக இருக்கிறது.

திருப்பூர் சுற்று வட்டாரத்தில் பெய்யும் மழை இந்த பகுதியில் உள்ள விவசாயிகளுக்கு உதவுகின்றதோ இல்லையோ முறையற்ற, அனுமதி பெறாமல் இயங்கிக் கொண்டுருக்கும் சாயப்பட்டறைகளுக்கு பம்பர் லாட்டரி.

மாசுகட்டுப்பாட்டு வாரியத்திற்கு தெரியாமல் (தெரிந்தும்?) தங்கள் பகுதியில் பள்ளத்தில் சேர்த்து வைத்திருக்கும் சாய நீரை எளிதாக இந்த தண்ணீரோடு சேர்த்து கலந்து விட்டு விடலாம் அல்லவா.

ஏற்கனவே திருப்பூர் முக்கால் வாசி மூழ்கிப் போய்விட்டது.  இன்னமும் மீதி இருப்பதால் பலரும் இதற்காகவே உழைத்துக் கொண்டு இருக்கிறார்கள்.

நல்லது நடக்க வேண்டும் என்றால் சில அழிவுகளை நாம் கண்ணால் காண வேண்டும் என்பார்கள்.  பார்க்கலாம்.  பாதிப் பேர்கள் சொத்துக்களை விற்று தங்களை காப்பாற்றிக் கொண்டு இருக்கிறார்கள்.  மீதிப் பேர்கள் மனம் திருந்த மார்க்கம் இல்லாத வழியில் பயணித்துக் கொண்டுருக்கிறார்கள்.

அனுபங்கள் ஆசிரியராக பொறுமையாக பாடம் கற்பிக்கும். பாடத்தை புரிந்து கொள்ள விரும்பாதவர்களுக்கு பாடங்கள் பாம்பாக மாறி கற்பிக்கும்.
                                                                •••••••••••••••••••••••••••••••••••

நொய்யல் நதியை காப்போம் என்று திருப்பூரில் உள்ள நண்பர்கள் முகப்பு நூல் ஒன்றை உருவாக்கி உள்ளார்கள்.  

அதில் முகப்பு படமாக உள்ள தற்போதைய நொய்யல் ஆற்றின் படம் இது. படத்தை சொடுக்கினால் நண்பர்கள் உருவாக்கியுள்ள முகப்பு நூலுக்கு உங்களை அழைத்துச் செல்லும்.

மழையை ரசிப்பதும் அதில் நினைவதும்  சுகமே.  பெய்த மழையில் அடித்துச் செல்லும் கழிவுகளைப் போல பல சமயம் அடித்தட்டு மக்களின்  இயல்பான வாழ்வாதாரத்தையும் மாற்றி விடுகின்றது.
                                                                      •••••••••••••••••••••••••

நண்பருடன் பேசிக் கொண்டுருந்த போது நீங்க கூட தற்போதைய மின்வெட்டு பற்றி தெளிவாக எழுதவில்லை.  உங்களுக்கு அம்மையார் குறித்த பயமா? என்றார். 

கூகுள் ப்ளஸ் ல் இது விவாதமாக வரும் போது கூட கடைசியில் இது கலைஞர் செய்த முந்தைய தவறு என்றும், இல்லை இது இந்த ஆட்சியின் நிர்வாக சீர்கேடு.  எவரும் பேசப் பயப்படுகிறார்கள். பயந்தாங்கோலி பக்கோடாக்கள் என்கிற ரீதியில் முடிவில்லாமல் போய்க் கொண்டே இருக்கிறது. 

தம்பியண்ணன் அப்துல்லா கூட உயர்வு நவிற்சி அணியில் என்னைப் பற்றி விமர்சித்து இருந்தார்.

கூகுள் ப்ளஸ் ல் சொல்ல முடியாத, நண்பர் ராஜமாணிக்கம் தமிழ் ஹிந்துவில் எழுதிய இரண்டு கட்டுரைகளுக்கு அப்பாற்பட்டு இது குறித்து எழுத வேண்டும் என்று மனதில் வைத்து இருந்தேன். ஒரு மாதத்திற்குப் பிறகு நண்பர் சென்னையில் இருந்த போது கொடுதத புத்தகத்தை முழுமையாக வாசிக்க முடிந்தது.


மின்சாரம் -- பயன்படுத்த அல்ல. புரிந்துகொள்ள மட்டும்  

என்ற தலைப்பில் சில பதிவுகளாக எழுத நினைத்துள்ளேன். முழுக்க முழுக்க புள்ளி விபரங்களை பல வித ஆதாரங்களோடு மிகத் தெளிவாக சா. காந்தி அவர்கள் எழுதி உள்ளார்.

சென்னையில் இருந்த போது நண்பர் என்னிடம் கொடுத்த புத்தகத்தை முழுமையாக வாசித்து முடித்த போது தலைசுற்றாத குறை தான்.  காரணம் தற்போது தமிழ்நாட்டில் இருக்கும் மின்சார தட்டுப்பாடு குறித்து தமிழ்நாடு மின்துறைப் பொறியாளர்களின் அமைப்பின் தலைவரான சா. காந்தி அவர்களால் எழுதப்பட்ட புத்தகம் 

தமிழகத்தில் மின்வெட்டும் மின் கட்டண உயர்வும் -- காரணமும் தீர்வும். 

ஏறக்குறைய நம்முடைய தமிழ்நாடு மின்சார வாரியம் சுய பரிசோதனை செய்து கொண்டு ஒரு வெள்ளை அறிக்கை வெளியிட்டால் எப்படி இருக்குமோ அந்த அளவுக்கு இந்த புத்தகத்தில் சா. காந்தி அவர்கள் தகவல்களை ஆணித்தரமாக கொடுத்துள்ளார். 

கட்சி சார்பற்று, மொத்தமாக நம்முடைய மின்சார வாரியங்கள் கடந்து வந்த பாதை, இந்தியாவில் உள்ள மொத்த மினசாரத்தடத்தின் கதை என்று எல்லா பக்கமும் உள்ள நிறை குறைகளை அலசி துவைத்து காயப்போட்டு உள்ளது. 

இந்த புத்தகத்தை மே 17 இயக்கம், பெரியார் திராவிடர் கழகம் சேர்ந்து ஆழிப்பதிப்பகம் மூலம் வெளியிட்டுள்ளார்கள்.  நண்பரிடம் அனுமதி பெற்ற காரணத்தால் இதில் உள்ள முக்கிய தகவல்களை வலைபதிவில் எழுதி வைக்க விரும்புகின்றேன்.

அதற்கு முன்னால் பொதுவான சில விசயங்களைப் பார்த்து விடலாம்.

சென்ற ஆட்சியில் மின் தட்டுப்பாடு காரணமாக முன்னாள் அமைச்சர் ஆற்காடு வீராசாமியைப் பற்றி செய்திதாள்களிலும், தளங்களிலும் வந்த நக்கல் விமர்சனங்களை நாம் எவரும் மறந்து விடமுடியாது.  அதே நிலைமையில் இன்றைய காலகட்டத்தில் இன்றைய மின்துறை அமைச்சராக நத்தம் விஸ்வநாதன்.  

நன்றாக விபரம் தெரிந்தவர்கள் மின்சாரத் துறைக்கு அமைச்சராக வருபவர்களை கழிவிரக்கத்தோடு தான் பார்ப்பார்கள். காரணம் தற்போதைய நிலைமையில் தமிழ்நாடு மின்சார வாரியம் என்பது வழங்கும் மின்சாரத்திற்கு வசூல் செய்வது மட்டும் தான் ஒரே வேலை.  மற்றபடி எந்த அதிகாரமும் இல்லாத துறை. மாநிலத்தின் முதலமைச்சர் கூட ஒன்றும் செய்யமுடியாது என்கிற நிலைமை தான் எதார்த்தம்.

குழப்பாக இருக்கிறதா?

மேற்கொண்டு படிக்கக் காத்திருக்கவும்.

அடுத்து ஆட்சிக்கு வருபவர்களுக்கு இரண்டு முக்கிய பிரச்சனை காத்துக் கொண்டு இருக்கிறது.  ஒன்று தண்ணீர் மற்றொன்று மின்சாரம்.
                                                                                  ••••••••••••••••••••••••••

சில நாட்களுக்கு முன் குழந்தைகளுடன் ரசித்து பார்த்த படம் சமீபத்தில் வெளிவந்த சாட்டை.  


நண்பர்களின் கருத்துப்படி இது மிகைப்படுத்தப்பட்ட உணர்ச்சிகளுடன் வெளிவந்த படம் என்கிறார்கள். தற்போதைய சூழ்நிலையில் அம்மணமாக இருக்கும் ஊரில் கோவணம் கட்டியிருந்தால் கூட அவமானம் தான்.  படங்களில் இரண்டு பேர்கள் சேர்ந்து மது அருந்தும் காட்சி வந்தால் மதுப்பழக்கம் உடல் நலத்திற்கு தீங்கானது என்று மிகச் சிறிய எழுதுக்ககளில் கீழே வரும்.  அதைப் போலவே புகை பழக்கத்திற்கும்.  

ஆனால் இந்த சிறிய எழுத்துக்களை எவர் கண்டு கொள்வார்கள்? திருந்துவார்கள் என்ற ஆராய்ச்சி தேவையில்லை.  

தவறான பழக்கம் என்பது இயல்பானதாக மாறிவிட்ட சமூகம் இது.  

ஆனால் கிராமத்து பள்ளிக்கூடங்களில் இன்றும் கந்து வட்டி ஆசிரியர்கள், சாதி வெறி பிடித்த ஆசிரியர்கள், வாங்கும் சம்பளத்திற்கு மனசாட்சிக்கு கூட பயம் இல்லாமல் வேலை செய்ய விருப்பம் இல்லாமல் இருப்பவர்கள், கிராமம் என்றால் லட்சக்கணக்கான பணம் கொடுத்து மாற்றலாகி நகர்ப்புறத்திற்கு வருகின்ற ஆசிரியர்கள், அடிப்படை வசதியற்ற கிராமத்து பள்ளிக்கூடங்கள், மாணவர்களை மனிதர்களாகவே மதிக்க மறுக்கும் ஆசிரியர்கள் என்று பலவற்றையும் பார்த்துக் கொண்டு இருக்கின்றோம்.

ஆனால் நாம் ஏற்றுக் கொள்ள விருமபுவதில்லை.  

நாமும் அதே போலத்தான் அந்த தடங்களைத் தாண்டித்தான் இந்த நிலைமைக்கு வந்து இருந்தால் கூட இப்ப பழைய நிலைமைக்கு மோசம் இல்லை என்று சொல்லிக் கொண்டு நம் குழந்தைகளை ஆங்கில பள்ளிக்கு அனுப்பிக் கொண்டு இருக்கின்றோம்.

திரைப்படம் என்பது வியாபாரம்.  போட்ட முதலீட்டை எடுத்தே ஆக வேண்டும்.  ஆனால் அதற்கு அப்பாலும் படம் எடுப்பவர்களுக்கும், இயக்குநர்களுக்கும் சில அடிப்படை கடமைகள் இருக்கிறது.  

அதைப்பற்றி பேசும் போது தான் எதார்த்தம் தெரியாதவன் என்று முத்திரை குத்தப்படுகின்றது.

என் மூத்த சகோதரி கண்டிப்புக்கு பெயர் போனவர்.  திருவண்ணாமலை மாவட்டத்தில் உள்ள ஒரு சிறிய கிராமத்தில் தனது ஆசிரியை பணியைத் தொடங்கினார். கல்லூரியில் பணிபுரிய  வாய்ப்பு வந்த போது எங்கள் குடும்பத்தில் அனுமதிக்கவில்லை.

மாறுதல் வாங்க மனமில்லாமல் நீண்ட வருடங்கள் அங்கேயே இருந்தார். பத்தாண்டுகளுக்கு முன் திருவண்ணாமலையின் உள்ளடங்கிய கிராமத்திற்கு குறிப்பாக போலூர் பக்கம் உள்ளே சென்றால் அது ஒரு தனி உலகமாக இருக்கும்.

பணியில் இருந்த போது பல முறை மிரட்டலுக்கு ஆளானவர்.  ஆனால் விடாமுயற்சியில் பணிபுரிந்த 12 வருடங்களில் அந்த அரசு பள்ளிக்கூடத்தை முன்னேற்றிக் காட்டினார்.  துனை தலைமையாசிரியாக இருந்தவருக்கு தலைமையாசிரியர் பொறுப்பு வந்த போது, காத்துக் கொண்டு இருந்தவர்கள் கோவில்பட்டிக்கு அருகே தூக்கியடித்தனர். அங்கும் பல பிரச்சனைகள் உருவானது. இரண்டு குழந்தைகளையும் அரசாங்க பள்ளியில் தான் படிக்க வைத்து மாவட்ட அளவில் சிறப்பாக தேர்ச்சி பெற்றனர்.  நீண்ட வருடங்களாக ஊருக்கு வெகு தூரத்தில் இருந்து விட்டோம். கடைசி காலத்தில் ஊருக்கு அருகே இருப்போம் என்று தற்போது தேவகோட்டை கல்வி மாவட்டத்திற்கு மாறுதல் வாங்கிக் கொண்டு தேவகோட்டை பகுதியில் உள்ள ஒரு கிராமத்தில் ஒரு அரசு பள்ளியில் தற்போது தலைமை ஆசிரியராக பணிபுரிந்து கொண்டு வருகிறார்.

 ஏற்கனவே இந்த பகுதியைப் பற்றி தெரிந்தவர்களுக்கு (சாதிப் பிரச்சனை) முழு பின்புலமும் தெரியும். ஒவ்வொரு வாரமும் அவருடன் அழைத்துப் பேசும் போது அவருடைய புலம்பல்களை பொறுமையாக கேட்டுக் கொள்வதுண்டு., இன்றைய கல்வியின் குறிப்பாக அரசாங்கப் பள்ளியின் தரத்தை மாணவர்களின் சிந்தனைகளை, சுயநலமிகளின் போக்கை புரிந்து கொள்ள முடிகின்றது.

ஆனால் இதையும் தாண்டி சில நல்ல பள்ளிக்கூடங்களும் இருக்கின்றது.

திருப்பூர் மாவட்டத்தில் பல பள்ளிக்கூடங்கள் வெகு சிறப்பாக செயல்பட்டுக் கொண்டுருக்கின்றது.  சிவகங்ககை மாவட்ட கல்வி முதன்மை அதிகாரி நடத்தும் கூட்டத்தில் இங்குள்ள அரசாங்க பள்ளிகளைப் பற்றி  குறிப்பிட்டு  சொல்லும் அளவிற்கு என்றால் பார்த்துக் கொள்ளுங்க.

காரணம் மனதிர்களும் அவர்களின் மனசும் தான் காரண்ம்.

மனிதர்களுக்கு பணம் மட்டும் தேவை எனில் பல தொழில்கள் இருக்கின்றது. பேரூந்து நிலையத்தில் மூத்திரம் போக இரண்டு ரூபாய் வாங்கிக் கொண்டு ஓப்பந்தகாரர்களாக, அதில் பணிபுரிபவர்களாக வாழ்க்கை நடத்துபவர்கள் வரைக்கும் இந்த உலகத்தில் பலரும் வாழ்ந்து கொண்டு தான் இருக்கிறார்கள். அவர்களுக்கும் தினந்தோறும் பணம் தான் கிடைக்கின்றது. இதுவரைக்கும் இலைமறை காயாக நடந்து கொண்டுருந்த விசயங்கள் தற்போது நவீனமாக சமீப காலமாக திருப்பூர் நட்சத்திர ஹோட்டலில் வளர்ந்து கொண்டு இருக்கும் விபச்சாரம் வரைக்கும் பணம் சம்பாரிக்க எத்தனையோ வழிகள் இருக்கின்றது.

சமீபத்தில் ருக்மாங்கதன் (தற்போது செக்ஸ் படங்கள் எடுத்துக் கொண்டுருப்பவர்) போல அப்பட்டமாக எடுத்து ஆமாடா நான் இப்படித்தான்.  நீங்க பெரிய ஒழுக்கமா? என்று கேட்டு விடலாம் 

அவர் கொடுத்த பத்திரிக்கை பேட்டியிலும் தைரியமாக இப்படித்தான் பேசியுள்ளார்.

அவர் சொல்லியுள்ள எதார்த்தம் முற்றிலும் உண்மை.

பாராட்டத் தோன்றுகின்றது.

முடிந்தால் குழந்தைகளுடன் சாட்டை படம் பாருங்கள். 

அன்பே சிவம் எடுத்த பிறகு இயக்குநர் மற்றும் நடிகர் சுந்தர் சி எனது திரைப்பட வாழ்க்கையில் இது போன்ற ஒரு படமும் எடுத்துள்ளேன் என்பதே எனக்கு பெரிய திருப்தி என்று சொன்னது போல சமுத்திரகனியும், இயக்குநர் அன்பழகனுக்கும் இது முக்கிய படம்.

முக்கியமாக தயாரிப்பாளர்களில் ஒருவரான இயக்குநர் பிரபு சாலமன் அவர்களையும் பாராட்டத் தோன்றுகின்றது.  

தம்பி ராமையா மிகச் சிறந்த நடிகர் என்பது ஏற்கனவே தெரிந்த விசயம். இந்த படத்திலும் சமுத்திர கனிக்கு போட்டி போட்டு நடித்துள்ளார். வலைதளத்தில் பெரும்பாலும் நல்ல விதமாகத்தான் இந்த படம் குறித்து எழுதி உள்ளனர். 

இது போன்ற படங்களுக்கு குறைந்த பட்சம் அரசாங்கம் வரிவிலக்கு கொடுக்க வேண்டும்.

காசுக்காக அலைந்தோம். காசுக்காகவே அலைகின்றோம்.  காசுக்காகவே எல்லாவற்றையும் இழந்து கொண்டும் இருக்கின்றோம்.

Tuesday, October 30, 2012

இந்தியாவிற்குள் உள்ளதா தமிழ்நாடு?



மானியங்கள் இல்லாவிட்டால் நம் நாடு சிறப்பாக வந்து விடும்.

இது இயல்பாகவே இந்தியாவில் படித்தவர்கள் எப்போதும் உச்சரிக்கும் வார்த்தைகள். ஆனால் பிரிட்டன் மற்றும் அமெரிக்கா போன்ற நாடுகள் தன் நாட்டில் உள்ள விவசாயிகளுக்கு எந்த அளவுக்கு மானியங்கள் மூலம் அவர்களை காத்துக் கொண்டு இருக்கிறார்கள் என்பது பலருக்கும் தெரிவதில்லை.  

உலகளாவிய பொருளாதாரம் என்ற வார்த்தை இந்தியாவிற்குள் வந்த பிறகு உலகில் உள்ள பன்னாடு நிறுவனங்களுக்கு இந்தியா என்பது ஒரு அற்புதமான சந்தையாக மாறியுள்ளது. 

தவறில்லை.

தரமான பெருட்கள் கிடைக்கும். போட்டிகள் அதிகமாகும். உள்ளே பழமைவாத சிந்தனைகளில் ஊறிக் கொண்டுருப்பவர்கள் மாறியே ஆக வேண்டும் என்ற சூழ்நிலையும் உருவாகும்.  படித்தவர்கள் வெளிநாடு செல்ல தேவையில்லை. ஆனால் வருகின்ற ஒவ்வொரு நிறுவனங்களும் புறவாசல் வழியாகவே வருகின்றது. எந்த ஒப்பந்தங்களும் வெளிப்படையாக இருப்பதில்லை. 

அது குறித்து எவரும் தகவல் அறியும் உரிமைச் சட்டத்தின் வாயிலாக கேட்டால் கூட ஆயுட்காலம் முடிவதற்குள் முழுமையான விபரங்கள் கிடைத்தால் ஆச்சரியமே.

அந்நிய முதலீடு என்பது இந்தியாவிற்கு தேவை என்பது எத்தனை முக்கியமோ அதே போல் உள்ளே இருக்கும் அடிப்படை கட்டுமானம் சிதையாமல் இருப்பதும் முக்கியம் தானே.?

ஓராயிரம் உள்நாட்டு தொழிலை அழித்து ஒரு பன்னாட்டு நிறுவனம் வளர்க்க நம் நாட்டு அரசியல்வாதிகளுக்கு இந்த அளவுக்கு ஆர்வம் இருக்க காரணம் என்னவாக இருக்க முடியும்?

தேசப்பற்று என்று நீங்கள் சொன்னால் உலகத்தோடு ஒட்டி வாழ்ந்து கொண்டு இருக்கிறீர்கள் என்று அர்த்தம். வேறுவிதமான கற்பிதம் செய்து கொண்டால் அது உங்கள் சிந்தனையின் தவறாகவே இருக்கும்.

உங்கள் சிந்தனையை மாற்றிக் கொள்ளுங்க.

இந்தியாவில் உள்ள பகாசுர நிறுவனங்களின் முழுமையான செயல்பாடுகளும் நமக்குத் தெரிய சில காலம் பிடிக்கும்.  தெரிய வரும் போது எதிர்க்க முடியாது.  எதிர்ப்பை அடக்க அத்தனை அரசு எந்திரங்களும் ஒன்றாக சேர்ந்து செயல்படும்.  இது நாம் பார்த்துக் கொண்டுருக்கும் உண்மை. 

தற்போது இந்தியாவின் நிதித்துறை அமைச்சராக இருக்கும் ப.சிதம்பரம் அற்புதமான அறிவாளித்தனமான மற்றொரு திட்டத்தையும் அறிவித்துள்ளார். பொதுத்துறை நிறுவன பங்குகளை தனியாருக்கு விற்று இந்தியாவின் பொருளாதாரத்தை நிலைப்படுத்தப் போவதாக சொல்லியுள்ளார்.  அந்த பொதுத்துறை நிறுவனம் லாபகரமாக இருந்தாலும் கூட அது குறித்து கவலைப்படப் போவதில்லை.  

மொத்தத்தில் தாங்கள் நினைத்தபடி, தாங்கள் விரும்பிய ஆட்களுக்க தற்போது லாபம் ஈட்டிக் கொண்டுருக்கும் நிறுவன பங்குகளில் குறிப்பிட்ட சதவிகிதத்தை தாரை வார்த்து விடுவது.  

பிறகென்ன?

மெதுமெதுவாக அந்த நிறுவனமே தனியார்களின் கைக்கு வந்துவிடும். ஆனால் தொடங்கும் போது மெதுவாகத் தான் தொடங்குவார்கள்.  

இதைப் போன்ற ஒரு திட்டம் தான் தற்போது ஒன்று உருவாகிக் கொண்டுருக்கிறது.  

இங்கு பேசவிருக்கும் மொத்த திட்டத்தையும் பார்க்கும் போது தமிழ்நாடு என்பது இந்தியாவில் உள்ள ஒரு மாநிலமா? இல்லை அருகில் உள்ள நாடா? என்று யோசிக்க வைத்துவிடும் போல.  அந்த அளவுக்கு ஏகப்பட்ட குளறுபடிகளுடன் இந்த திட்டம் நடைமுறைக்கு வந்துள்ளது. தற்போது ஆண்டு கொண்டுருக்கும் காங்கிரஸ் அரசாங்கம் கட்சி அடிப்படையில் காங்கிரஸ் ஆளும் மாநிலங்களுக்கு ஒரு மாதிரியாகவும், காங்கிரஸ் ஆட்சியில் இல்லாத மாநிலங்களுக்கு வேறு விதமாகவும் தங்கள் நல்ல செயல்களை திட்டமிட்டு செய்து கொண்டு வருகிறார்கள். 

முதல் முறையாக ஒரு மாநில அரசாங்கம் மத்திய அரசாங்கத்தின் கொள்கையின் மேல் களங்கம் கற்பித்து நீதிமன்றத்தை நாடுவது இது தான் முதல் முறையாக இருக்கக்கூடும்.

டெல்லிக்கு தேவையில்லாத மின்சாரத்தைக் கூட தமிழ்நாட்டுக்கு தர மனமில்லாத அளவுக்க காங்கிரஸ் அரசாங்கம் புத்திசாலிகளால் கொள்கை வடிவமைக்கப்பட்டு வருகின்றது.

முடிந்தவரைக்கும் மின்சாரம் முதல் ரயில்வே திட்டங்கள் முதல் அத்தனை விசயங்களிலும் தற்போதைய மத்திய அரசாங்கம் புகுந்து விளையாடிக் கொண்டுருக்கிறது.


படத்தை நன்றாக பார்த்துவிட்டு மேலே படிக்கத் தொடங்கலாம்.

இந்திய அரசின் நிறுவனமான கெயில் Gas Authority of India Limited's (GAIL) ஒரு திட்டத்தை வடிவமைத்து உள்ளது. அதாவது கேரளாவில் உள்ள கொச்சியில் இருந்து கர்நாடகாவில் உள்ள மங்களூர் வரைக்கும் பைப்லைன் மூலமாக எரிவாயு (கேஸ்) எடுத்துச் செல்லும் திட்டம்.  liquefied natural gas (LNG) இந்த திட்டத்தின் மூலம் பதிக்கப்பட்ட குழாய் மூலம் நாள்தோறும் 16 MMSCMD (million metric standard cubic metre கொண்டு செல்ல முடியும். 

871 கிலோ மீட்டருக்கு கோவை, திருப்பூர்,நாமக்கல்,சேலம், தர்மபுரி, கிருஷ்ணகிரி மாவட்டம் வழியாக விவசாய நிலங்கள், தேசிய நெடுஞ்சாலை வழியாக கியாஸ் பைப்லைன் கொண்டு செல்லப்படுகிறது. இதற்காக கெயில் நிறுவனம்  விவசாயிகளிடமிருந்து  நில அனுபவ உரிமையை எடுத்துக் கொள்ளுவதுடன் நிலத்தில் மதிப்பீட்டில் பத்து சதவீதத்தை விவசாயிகளுக்கு நஷ்ட ஈடாக வழங்கும். பைப் லைன் பதிக்க எடுக்கப்படும் நிலத்தின் இரண்டு பக்கங்களிலும் தலா 10 மீட்டருக்கு இடம் தேவை.பைப்புகள் 5 அடி ஆழத்திற்கு பதிக்கப்படுகின்றன. பைப்பில் விட்டம் 2 அடி ஆகும். பைப் லைன் அமைக்கப்படும் பகுதியின் மீது பயிரிடுவது, வீடுகள் கட்டுவது, மரம் நடுவது, ஆழ்குழாய் கிணறு தோண்டுவது தடை செய்யப்பட்டுள்ளது. 

ஆழமாக வேரோடும் பயிர்களை கியாஸ் பைப் லைன் செல்லும் பகுதிகளில் பயிரிடக் கூடாது என்பது முக்கிய நிபந்தனையாகும்.மேலும் விவசாய நிலங்கள் வழியாக செல்லும் கியாஸ் பைப் லைன் சேதமடைந்தால் சம்பந்தப்பட்ட விவசாயிக்கு மரண தண்டனை விதிக்கப்படுமாம்.கியாஸ் பைப் லைன் அமைக்க உருவாக்கப்பட்டுள்ள  புதிய சட்ட மசோதா படி பைப் லைன் அமைக்க நிலத்தை ஒப்படைக்கும் விவசாயிகளே கியாஸ் பைப் லைன் களுக்கு பாதுகாப்பு வழங்க வேண்டுமாம்.

பொறுப்பற்ற தன்மையா? இல்லை எவ்வளவு அடித்தாலும் தாங்குபவர்கள் தமிழர்கள் என்று நினைத்துக் கொண்டார்களோ என்பது தெரியவில்லை.  மூக்கைத் தொட தலையைச் சுற்றி கையை கொண்டு வருவது போல இதன் திட்ட வரைபடங்கள் அப்படித்தான் தெரிவிக்கின்றது.  பாதிக்கப்பட்டுள்ள ஒவ்வொரு விவசாயிகளும் அந்த அளவுக்கு நொந்து போய் உள்ளார்கள். 

இந்த பைப் செல்வதால் அந்த நிலத்தில் விவசாய கட்டுப்பாடு வரும். அதாவது தண்ணீர் பாய்ச்சகூடாது; மழை பெய்தால் அதைக்கொண்டு பயிர் செய்யலாம்; உழுதல் கூடாது; மரம்,வீடு,ரோடு கூடாது. அந்த பைப்லைனுக்கு பாதிப்பென்றால் அந்த விவசாயிதான் பொறுப்பு! எப்படி நியாயம்?? 

இதற்கு அவர்கள் தரும் இழப்பீடு ஏக்கருக்கு ஆயிரம் ரூபாய்! 

இவர்கள் சொல்லும் காரணம் தமிழகம் வழியாக வந்தால் 310கிமீ; கேரளா, மைசூரு வழியாக வந்தால் 470 கிமீ. ஆனால் வரைபடத்தை பார்த்தால் எது குறைந்த தூரம் என்பது விளங்கும். 

அந்த பாதையைவிட தமிழக பாதையில் மலைகளும் வனப்பகுதியும் அதிகம்.

இந்த திட்டத்தில் மூன்று மாநிலங்கள் சம்மந்தப்பட்டுள்ளது. விற்பனையின் மூலம் வருவாய் கேரளாவுக்கு, எரிவாயு சென்றடையும் மாநிலம்  கர்நாடகா. ஆனால் இந்த குழாய்கள் பதிக்கப்படுவது பெரும்பாலும் தமிழ்நாட்டு பகுதிகளில்.

குறிப்பாக திருப்பூர் சார்ந்த பகுதிகளில் உள்ள விளைநிலங்களுக்குத் தான் அதிக அளவு பாதிப்பு உருவாக்கும். 

310 கி.மீ. தூரத்துக்கு கொண்டு செல்லப்படும் இந்த பைப் லைன்கள், கோவை, திருப்பூர், ஈரோடு, நாமக்கல், சேலம், தர்மபுரி, கிருஷ்ணகிரி ஆகிய 7 மாவட்டங்களில் உள்ள 126 கிராமங்களில் உள்ள விவசாய நிலங்கள் மற்றும் நெடுஞ்சாலைகள் வழியாக அமைக்கப்படுகிறது.

கோவை மாவட்டத்தில் 15 கிராமங்களும், திருப்பூர் மாவட்டத்தில் 22 கிராமங்களும், ஈரோடு மாவட்டத்தில் 16 கிராமங்களும், நாமக்கல் மாவட்டத்தில் 9 கிராமங்களும், சேலம் மாவட்டத்தில் 29 கிராமங்களும், தர்மபுரி மாவட்டத்தில் 27 கிராமங்களும், கிருஷ்ணகிரி மாவட்டத்தில் 18 கிராமங்களிலும் கடுமையாக பாதிப்படைந்துள்ளன.

இந்த கிராமங்களில் விவசாயிகள் தென்னை, பனை, மரங்களை வளர்க்க முடியாது, பணப்பயிர்களை சாகுபடி செய்ய முடியாது, வீடு,கட்டிடம் கட்ட முடியாது, கனரக வாகனங்களை இயக்க முடியாது.

இதனால் ஆயிரக்கணக்கான விவசாயிகளின் வாழ்வாதார உரிமை பறிபோகும் ஆபத்து எழுந்துள்ளது. விவசாய நிலங்கள் வழியாக கொண்டு செல்லப்படுவதற்கு பல்வேறு பகுதிகளில் விவசாயிகள் எதிர்ப்பு தெரிவித்து வருகின்றனர். திருப்பூரிலும் கடந்த 5 மாதங்களாக விளை நிலங்கள் வழியாக எரிவாயு குழாய் பதிக்கும் பணிக்கு கடும் எதிர்ப்பு நிலவி வருகிறது.

காங்கயம  தாலுகாவில் கத்தாங்கன்ணி, அவிநாசி தாலுகா சர்க்கார் கத்தாங்கன்னி, ஊத்துக்குளி, பொங்கலூர் அருகே  உள்ள பெருந்தொழுவு உள்ளிட்ட பகுதிகளை சேர்ந்த விவசாயிகள் பெருமளவில் பாதிக்கப்படும  நிலை ஏற்பட்டுள்ளது. விவசாயிகளின் எதிர்ப்பு காரணமாக இப்பகுதியில் பணிகளை தொடர முடியாத நிலை ஏற்பட்டுள்ளது.

நிலங்களை துண்டாடும் சம்பவங்கள் தொடர்ந்து வருகிறது. தற்போது எரிவாயு குழாய் அமைக்கும் பணி காரணமாக ஒரு ஏக்கர், 2 ஏக்கர் நிலங்கள் துண்டாடப்படும் சூழல் உருவாகி, விவசாயிகள் கடும் பாதிப்பை சந்திக்கும் நிலை ஏற்பட்டுள்ளது. குழாய் பதிக்கப்பட்ட நிலத்தில் 60 அடிக்கு எந்த பணிகளையும் செய்ய கூடாது என நிபந்தனை உள்ளது.

இத்திட்டத்தால் விவசாயிகளின் வாழ்வாதரம் கடுமையாக பாதிக்கப்படும். எனவே நெடுஞ்சாலை ஓரம், ரயில  பாதை ஓரம் அல்லது ஆற்றங்கரை ஓரத்தில் இந்த குழாய்களை கொண்டு செல்ல வேண்டும். அமெரிக்கா போன்ற நாடுகளில் நெடுஞ்சாலை வழியாகத்தான் கொண்டு செல்லப்படுகின்றன. இதனால் இந்த திட்டத்தை மாற்றுப்பாதையில் செயல்படுத்த வேண்டும்.

வீடு, கிணறு, ஆழ்குழாய் கிணறு ஆகியவையும் பாதிப்படைகிறது, இதற்கான இழப்பீடு மிகவும் குறைவாக இருக்கிறது. விவசாயிகள  நலன் குறித்து எண்ணிப்பார்க்காமல், குழாய் அமைக்கும் பணியை தொடர்ந்தால், பாதிக்கப்பட்ட விவசாயிகள் தங்களது போராட்டத்தை தொடங்கி உள்ளனர்.  கூடங்குளம் போல இது விஸ்பரூபம் எடுக்குமா? இல்லை பிணந்தின்னி கழுகுகள் போல கொடுப்பதை வாங்கிக் கொண்டு நம்முடைய அரசியல் சேகவர்கள் அமைதி காப்பார்களா? என்று தெரியவில்லை. .

இதைப் போலவே மற்றொரு திட்டமும் உருவாகிக் கொண்டுருக்கிறது. 

சென்னை தூத்துக்குடி இடையே நிலத்திற்கு அடியில் ‌பைப் மூலம் கேஸ் கொண்டு செல்லும் பணி நடைபெற உள்ளது. மதுரை, திருவண்ணாமலை, சென்‌னை, திருச்சி, விழுப்புரம், நாமக்கல் உள்ளிட்ட 12 மாவட்டங்கள் வழியாக செல்லும் இந்த திட்டம் சுமார் 640 கி.மீ., தூரம் அமைக்கப்படுகிறது. இதற்காக நிலங்‌கள் கையகப்படுத்தும் பணி நடைபெற்று வருகிறது.

இதற்காக செயற்கைக்கோள் மூலம் பைப்லைன் செல்லும் திட்டம் வகுக்கப்பட்டது.இந்த திட்டம் செயல்படுத்தும் போது, பைப்லைன் செல்லும் பகுதியில் 100 அ‌டி தூரத்திற்கு கட்டுமானப்பணிகள், போர்வெல் பணிகள் போன்றவை நடைபெற தடை விதிக்கப்படும்/

இந்த திட்டத்தை ரிலையன்ஸ் நிறுவனத்திற்கு சொந்தமான ரியாஜிஸ்டிக் இன்பர்ஸ்டிரக்சர் லிமிடட் நிறுவனம் செய்து வருகிறது. 

தற்போது மத்திய அரசாங்கம் வெற்றி கரமாக நிறைவேற்றியுள்ள ஒரு குடும்பத்திற்கு வருடத்திற்கு 6 கேஸ் சிலிண்டர் என்பது பல்லாயிரக்கணக்கான நடுத்தர வாழ்க்கை வாழ்ந்து கொண்டுருப்பவர்களின் வாழ்க்கையில் இடியாக விழுந்துள்ளது. 

ஆடம்பரம் இல்லாமல் இயல்பாக வாழ்ந்து கொண்டுருப்பவர்களுக்கு வருடத்திற்கு 8 கேஸ் சிலிண்டர் தேவைப்படும்.  வருடந்தோறும் ஒரு குடும்பத்திற்கு 6 கேஸ் சிலிண்டர் மானிய விலையிலும் அதற்கு மேல் தேவைப்படுவ்தை மானியம் இல்லாத விலையிலும் வாங்கிக் கொள்ள வேண்டும்.

தற்போது ஒரு கேஸ் சிலிண்டர் (மானிய விலையில்) ரூபாய் 400.  மானியம் இல்லாமல் வாங்கும் போது இரண்டு மடங்கு அதிகமாகும்.  இதில் மற்றொரு கொடுமையும் உண்டு.  நாம் எப்போது இந்த கேஸ் சிலிண்டர் வாங்குகின்றோமோ அப்போது சந்தை நிலவரப்படி விலை ஏற்ற இறக்கம் இருக்கும்.

தற்போது மத்திய அரசாங்கத்தில் மாற்றப்பட்ட பெட்ரோலிய அமைச்சர் ஜெயபால் ரெட்டி கூட ரிலையன்ஸ் முகேஷ் அம்பானியுடன் மோதல் போக்கை கடைபிடித்த காரணத்தினால் தான் என்று பத்திரிக்கை செய்திகள் சொல்கின்றன.  

ஒரு பக்கம் அரசாங்க பொதுத்துறை நிறுவனம் மூலமும் அம்பானி நிறுவனங்கள் மூலம் இந்த எரிவாயு குழாய் திட்டங்கள் வெற்றிகரமாக நிறைவேற்றி முடித்து விட்டால் வீடுகளுக்கு தனியார் மூலமாக தேவைப்படும் எரிவாயு எளிதாக வழங்கப்பட்டு விடலாம்.

பன்னாட்டு நிறுவனங்களின் வளத்திற்காக விவசாயத்தை அழிக்க நினைக்கும் அரசின் கொள்கைகளை வகுப்பவர்கள் அத்தனை பேர்களும் அதி புத்திசாலிகளாக இருப்பதால் அடித்தட்டு மக்களின் வாழ்க்கை என்பது கேலிக்குறியாகவே இருக்கின்றது. 

இதனால் தான் இந்தியாவின் திட்டக்குழு துணைத்தலைவர் மான்டேக்சிங் அலுலாலியா தண்ணீரை விற்பனை செய்யும் போது தான் அதனை பயன்படுத்துபவர்களுக்கு ஒரு கவனம் உருவாகும் என்று போகிற போக்கில் தத்துவங்களை உதிர்த்துவிட்டு செல்கின்றார். 

சுட்டிகள்