கொரானா காலம்

2020 ஆம் ஆண்டு மார்ச் மற்றும் ஏப்ரல் மாதங்களில் வாழ்ந்து கொண்டிருக்கும் நாம், இப்போது நடந்து கொண்டிருக்கும் செயல்பாடுகளை 25 வருடங்கள் கழித்து அப்போது வாழ்ந்து கொண்டிருக்கும் புதிய தலைமுறைகளிடம் சொன்னால் நிச்சயம் நம்ப மறுப்பார்கள்.  அப்படியான சூழலில் நாம் இப்போது வாழ்ந்து கொண்டு இருக்கின்றோம். இதை ஆவணப்படுத்துவது முக்கியம் அல்லவா?

சென்ற மாதம் கொரானா தடைக்காலம் (மார்ச் 21 2020) தொடங்குவதற்கு முன்பு நான் ஆயிரமாவது பதிவு எழுதிய பின்பு நான் உருவாக்கிக் கொண்ட தடைக்காலம் (மார்ச் 19) தொடங்கியது.  ஏப்ரல் 19 அன்று முடிவுக்கு வருகின்றது.

2020 வருடத்தின் தொடக்கத்தில் உலகம் இப்படி மாறப் போகின்றது என்பதனை எவரும் சொல்லவில்லை. இந்த வருடத்தின் தொடக்கத்தில் ஜோதிடப்பலன்கள் சொன்ன அத்தனை பேர்களும் எந்த வருடமும் படாத கேவலங்களை அடைந்து விட்டார்கள்.  மீம்ஸ் மூலம் உலகம் முழுக்க பரவி அவமானப்பட்டார்கள். ஜோதிடக்கலையை பணத்திற்கு அப்பாற்பட்டு அதைக் கணிதச் சாஸ்திரமாகப் பார்ப்பவர்கள் நூற்றில் ஒரு சதவிகிதம் கூட இருப்பார்களா? என்பதே சந்தேகம் தான்.

மார்ச் 21 முதல் முதல் கொரானா தடைக்காலம் தொடங்கிய சமயத்திலேயே திருப்பூரில் உள்ள அனைத்து சங்கங்களும் ஏப்ரல் முழுக்க திருப்பூருக்குத் தடைக்காலம் என்று முன்பே அறிவித்து விட்டார்கள்.  நாங்கள் மனதளவில் தயாராகவே இருந்தோம்.

பிரதமர் மோடி இரண்டாவது முறையாக அறிவித்த மே 3 2020 வரைக்கும் உண்டான தடைக்காலத்தை சில வாரங்களுக்கு முன்பே திருப்பூர் முதலாளிகள் அறிவித்து விட்டார்கள்.

காரணம் உள்நாட்டு வர்த்தகம் மற்றும் வெளிநாட்டு வர்த்தகம் என்பது இப்போதைய சூழலில் நடக்க வாய்ப்பே இல்லை.  இது இயல்பு நிலைக்கு வருவதற்கு இன்னும் 90 நாட்கள் ஆகலாம். இதுவும் கடந்து போகும். வாழ்க்கை முறை மாறும். ருசி என்பது மாறி பசி என்பதற்குள் வந்து நிற்கலாம். பிழைத்து நிற்ப்பவன் சாதிக்கப் பிறந்தவன்.  

உலகப் பந்தில் உள்ள ஒவ்வொரு கண்டங்களிலும் உள்ள சிறிய மற்றும் பெரிய ஊர்கள் வரைக்கும் ஒரே மாதிரியான துன்பங்களை அனுபவிக்க வேண்டும் என்று இயற்கை வைரஸ் மூலம் உருவாக்கியிருப்பது ஆச்சரியமாக உள்ளது.

தினமும் ஒரு ஆங்கிலப்படம் பார்த்தேன்.  மகள்கள் மதியத்திற்கு மேல் தமிழ்ப்படம் ஏதாவது ஒன்றைப் பார்த்தனர். கண்ணும் கண்ணும் கொள்ளையடித்தால் என்ற படம் மட்டும் தான் நான் முழுமையாக அமர்ந்து பார்த்த தமிழ்ப்படம்.

மகள்கள் இருவர் யூ டியுப் பார்த்து, மனைவி ஒத்துழைப்பு மற்றும் ஒருங்கிணைப்புடன் நன்றாகச் சமைத்துக் கொடுத்தனர். கொடுக்கின்றனர்.  ஒருவர் மிக மிக அழகாகப் படம் வரைந்து கொண்டிருக்கின்றார். மூவரும் சில புத்தகங்களைத் தொடர்ந்து படித்துக் கொண்டிருக்கின்றார்கள்.

பதினோராம் வகுப்புக்கு இன்னும் ஒரு பரிச்சை உள்ளது.  பள்ளி திறந்தவுடன் வைப்பார்களா என்று தெரியவில்லை.

பத்தாம் வகுப்பு தான் பெரிய சிக்கலில் மாட்டிக் கொண்டது போலத் தடுமாறுகின்றார்கள்.  நூறு மீட்டர் ஓட்டப்பந்தயம் போல ஓடி வந்தனர்.  இந்த வருடம் புதிய சிலபஸ்(பாடத்திட்டம்). அவசரம் அவசரமாகப் பாடங்களை முடித்தனர்.  பாதிப் புரிந்து பாதிப் புரியாமல் ஆசிரியர்களும் கஷ்டப்பட்டு மாணவர்களுக்கு அதிக அளவு கஷ்டப்பட்டனர். கடைசியில் வைரஸ் ஆட்டத்தைக் கலைத்துப் போட்டு விட்டது.  

இப்போது ஜும் (ZOOM) செயலி மூலம் பாடங்கள் மறந்து போய்விடக்கூடாது என்பதற்காக நினைவூட்டி தினமும் காலை மாலை என்று வெவ்வேறு பாடங்களை ஆசிரியர்கள் நடத்திக் கொண்டு இருக்கின்றார்கள்.  இது தவிரப் பொதிகை தொலைக்காட்சியில் காலை 10 முதல் 11 மணி வரைக்கும் பத்தாம் வகுப்புக்குத் தினமும் ஒரு ஆசிரியர் குறிப்பிட்ட பாடத்திற்குப் பாடம் நடத்துகின்றார்கள்.  நவீனத் தொழில் நுட்ப வசதிகளை மாணவர்கள் இந்த வருடம் முழுமையாக உள்வாங்கியிருப்பார்கள் என்றே நினைக்கிறேன்.

வருகின்ற 19ந் தேதி முதல் காலை ஆறு மணிக்கு ஒரு பதிவும் மாலை ஆறு மணிக்கு ஒரு பதிவும் வெளியிட எண்ணம்.  இது என் நீண்ட நாள் கனவு.

"ஆயிரம் பதிவு" என்ற கனவு நிஜமானது.  "அமேசானில் 25" புத்தகங்கள் என்ற கனவும் நிஜமானது. 

அடுத்து தினமும் 2 பதிவுகள். 

இப்போதை சூழலில் வெளியே செல்ல முடியாது. செல்லக்கூடாது. மற்ற சமூக வலைதளங்கள் நீங்கள் சுற்றி வந்தாலும் வலைபதிவு என்பது மனதுக்கு நெருக்கமாகத்தான் உள்ளது. நிச்சயம் உங்கள் வாசிப்புக்குச் சுவராசியமாகவே இருக்கும் என்றே நம்புகிறேன்.

ஏற்கனவே ஃபேஸ்புக்கில் எழுதிய பலவற்றைச்  சேமித்து வைத்துள்ளேன்.  கொரானா வைரஸ் உருவானது, பரவியது, இந்தியாவிற்குள் நுழைந்தது, கேரளா வழியே பரவியது என்று ஏராளமான செய்திகள் உண்டு.

உலகம் முழுக்க நடந்த பல நிகழ்வுகள், சம்பவங்களை நான் வாசித்த பலவற்றையும் உங்களுக்கு அறியத் தருகிறேன்.

வீட்டுக்குள் இருப்போம்.

சமூக விலக்கத்தை கடைப்பிடிப்போம்.

அரசாங்கத்திற்கு ஒத்துழைப்பு அளிப்போம்.

1000